page

သင်နှစ်သက်ရာ အရောင် ဖြင့်ရွေးချယ်ကြည့်ရူနိုင်ပါသည်

Thursday, August 7, 2014

နှလုံးသားနှင့် ပြုံးပါ

ZOLZOL | 11:26 AM |
ZOLZOL | 11:26 AM |




Best Blogger Tips
Share


အရှုံးလည်းမပေးရသည့်အပြင် အမြတ်လည်းရသော ရင်းနှီးရသောအလုပ်ဟူသည် ပြုံးပြခြင်းပင် ဖြစ် သည်။ မိမိ၏ မျက်နှာလေးနှင့် မျက်လုံးလေးများကို အပြုံးများဖြင့် တန်ဆာဆင်ပါက လွန်စွာကျက်သ ရေရှိသည်ကို မိမိတို့ကိုယ်တိုင် သိချင်မှသိပေမည်။ မိမိ၏မျက်နှာကို မြင်တွေ့ရသူများကတော့ သိကြ ပေသည်။
အချို့သောသူများသည် ပြုံးရသောအလုပ်ကိုပင် အလွန်ခက်ခဲသောအလုပ်ကြီး လုပ်ရသည့်ပမာဖြစ် နေကြသည်။ အချို့များကတော့ ‘ပြုံးချင်စိတ်ကိုမရှိတာ ပြုံးလို့ဘာရမှာလဲ။ အာညောင်းရုံနဲ့ အာပြဲရုံပဲရှိ မှာပေါ့’ ဟု ဘုကျကျ ပြန်ပြောသည်များလည်းရှိသည်။ ‘ပြုံးရင်ပေါတယ်ထင်မှာစိုးလို့’ ဟု ဆိုသူများ လည်းရှိသည်။
ပြုံးလှ်ျင်ပေါသည်ဟု မည်သူကထင်မည်နည်း။ မိမိဘက်မှ တစ်ဖက်သားအပေါ်သို့ ပြုံးပြသော အမူအ ရာမမှန်လျှင်တော့ ထိုအထင်သည် မှန်ကောင်းမှန်နိုင်ပါသည်။ အပြုံးဟုဆိုရာတွင်လည်း နှလုံးသားမှ
လာသောအပြုံးကို ဆိုလိုခြင်းဖြစ်ရာ နှလုံးသားမှလာသောအပြုံး မဟုတ်ဘဲ အမုန်းတရားမှလာသော အပြုံးဖြစ်ပါက (သို့မဟုတ်) မိမိဖြစ်လိုရာအတွက် ပြုံးထားသောအပြုံးဖြစ်ပါက အဘယ်မှာလျှင် လှပပါ တော့မည်နည်း။ တစ်ဖန်ရာဂတဏှာကြောင့် တပ်မက်၍ကြည့်သော အခိုးတဝေဝေဖြစ်နေသည့် ခေါ တောတစ်ထောင်အား မျက်လုံးအနေအထားနှင့် ရမ္မက်အပြုံးဆိုပါက မည်သူကကြိုက်ပါမည်နည်း။
မိမိမုန်းသောသူကို စေတနာမပါဘဲ ပေးရကမ်းရပြောဆို ဆက်ဆံရသောအခါ မချိပြုံးပြုံးထားရသော ကြောင့် ထိုအပြုံးတို့သည် အဘယ်မှာလျှင် တောက်ပပါမည်နည်း။ သူတစ်ပါးအား ပျက်စီးစေလိုသော ရည်ရွယ်ချက်ကို ဆောင်ရွက်နေစဉ်တွင် ပြုံးထားရသော ထိုမျက်နှာဖုံးတပ် အပြုံးတို့သည်အဘယ်မှာ လျှင် ကျက်သရေရှိပါမည်နည်း။
ဟုတ်ပါသည်။ မိမိပါးစပ်ကို ဖြဲပြတိုင်းသည် ပြုံးပြခြင်းမဟုတ်သည်မှာ သေချာပါသည်။ သူတစ်ပါးအ ပေါ်စေတနာသန့်သန့်နှင့် ရိုးရိုးသားသားခင်မင်သော နှစ်လိုဖွယ်အပြုံးသည်သာလျှင် ကျက်သရေရှိ သော၊ လှပသောတကယ့်အပြုံးလေးများဖြစ်ပါသည်။ မိမိကိုယ်၌ကပင် အရောင်မဆိုးသော ချစ်စဖွယ် အပြုံးတို့ကိုသာ မြင်လိုလှသည်မဟုတ်ပါလား။
ဆေးသိပ္ပံတစ်ခု၏ တွေ့ရှိချက်အရလည်း ပြုံးနေစဉ်တွင် မိမိမျက်နှာပေါ်ရှိ အကြောငယ်လေးများ လှုပ် ရှားကြသည်။ ထိုအကြောလေးများသည် နုပျိုမှုကိုပေးစွမ်းစေပါသည်ဟူ၏။ ထို့အတူ မဲ့နေသောအခါ တွင်လည်း မျက်နှာပေါ်ရှိ အကြောလေးများ လှုပ်ရှားကြသည်။ သို့သော်မဲ့ခြင်းကြောင့်လှုပ်ရှားသော အကြောငယ်တို့သည် ပိုမိုအိုစာစေပါသည်ဟူ၏။ ထို့ကြောင့်နုပျိုလိုသောသူအပေါင်းသည် နှလုံးသားမှ လာသော စစ်မှန်သောအပြုံးများသာပြုံးရန် လိုပါသည်။
မုန်းနေသူနှစ်ဦးပင်လျှင် တစ်ဦးကစ၍နှစ်လိုစွာ ပြုံးပြပါကကျန်တစ်ဦးမှ မဲ့ပြမည်ဟုထင်ပါသလား။ အပြုံးချိုချိုအတွက် အပြုံးချိုချိုသာပြန်ရမည်မှာ မလွဲပေ။ စာရေးသူ၏အဖြစ်အပျက်တစ်ခုရှိသည်။ စာရေးသူသည် ငယ်စဉ်ကလွန်စွာစွာသည်။ မိမိပေါ်တွင်ကောင်းပါမှ ပြန်လည်ကောင်းပြတတ်သည်။ မျက်နှာထားလည်း လွန်စွာတည်သည်။ အပြုံးဟူသည် စာရေးသူအတွက် ပြုရခက်သောအရာတစ်ခု ဖြစ်ခဲ့ဖူးသည်။
တစ်ရက်တွင် စာရေးသူသည် ဆရာမတစ်ယောက်၏ အိမ်မှပြန်လာစဉ် အကြောင်းအရာတစ်ခုနှင့် ပတ်သက်၍ပြန်စဉ်းစားမိပြီး ပြုံးမိသွားသည်။ လမ်းမထက်တွင် လမ်းလျှောက်ရင်း ပြုံးမိသည်ဖြစ်ရာ ရှေ့မှလာနေသော သူငယ်ချင်းတစ်ဦးနှင့် ဆုံမိသည်။ စိတ်ကြည်နေသည်ဖြစ်ရာ မိမိစဉ်းစားမိပြီး အပြုံး နှင့်ရောလျက် သူ့ကိုပြုံးပြလိုက်သည်။ ထိုသူငယ်ချင်းသည် များမကြာခင်က စာရေးသူနှင့်အချင်းများ ထားပြီး စကားမခေါ်မပြောသူဖြစ်သည်။
စာရေးသူပြုံးသည်ကိုမြင်ပြီး သူငယ်ချင်းမှ စာရေးသူကိုပြန်ပြုံးပြသည်။ ထို့နောက်သူ့ဘက်မှ နှုတ်ဆက် စကားလာဆိုပြီး သူပြုံးကိုယ်ပြုံးနှင့် သူငယ်ချင်းနှစ်ဦးခေါ်ပြောဖြစ်ကာ ပြန်လည်သင့်မြတ်သွားကြ သည်။
ထိုမှစာရေးသူကို သင်ခန်းစာပေးလိုက်သည်မှာ ပြုံးပြခြင်းသည် သင့်မြတ်မှုကိုဖြစ်စေပြီး မိတ်ဆွေပေါ များခြင်း လူချစ်လူခင်များခြင်းပေတည်း။
မြတ်စွာဘုရား ဟောကြားတော်မူသော တရားတော်များလည်းရှိသည်။ ဒေါသထွက်နေသူရှိပါက ထိုသူ၏အမျက်ဒေါသသည် တစ်ဖက်သားကို ကူးစက်သွားပြီး ပူလောင်စေသကဲ့သို့ မေတ္တာထားသူရှိ ပါကလည်း ထိုသူ၏မေတ္တာဓာတ်တို့သည် အနီးအနားရှိသူတို့ကို ထိစပ်သွားကာ မေတ္တာငွေတို့ဖြင့် အေးမြစေပါသည်။
အလားတူစွာပင် မဲ့ပြသူအတွက် မဲ့ပြသောမျက်နှာတစ်စုံသာ ပြန်လည်ရရှိမည်ဖြစ်ပြီး ပြုံးပြသူအတွက် ပြုံးပြသောမျက်နှာတစ်စုံကို လက်ဆောင်ပြန်ရရှိမည်ဖြစ်သည်။ သက်ရောက်မှုတိုင်းတွင် တန်ပြန်သက် ရောက်မှု ရှိသည်ပင်မဟုတ်ပါလား။
မှန်ကြည့်သောသူအတွက် မိမိပြုသောအပြုအမူအတိုင်းသာလျှင် မိမိပုံရိပ်သည်မှန်တွင်အရိပ်ထင်ပေ သည်။ ထို့ကြောင့်အပြုံးလှလှ ရလိုသူအတွက် နှလုံးသားမှလာသော အပြုံးသာပြုံးစေချင်ပါသည်။
မိမိအပြုံးကြောင့် အောင်မြင်မှုရရှိခဲ့ကြသူများ လက်ညှိုးညွှန်ပါက မလွဲနိုင်ပေ။ စကားပြောတတ်ပါက လေယာဉ်ပင်အလကားစီးနိုင်သကဲ့သို့ ပြုံးပြခြင်းကြောင့်လည်း လိုရာခရီးကို အလွယ်တကူရောက်ရှိ နိုင်ပါသည်။
ထို့ကြောင့် တစ်ဦးနှင့်တစ်ဦးကြား အမုန်းတရားများကို ပျောက်ပျက်စေ၍ ချစ်ခြင်းတရားများသာ ပွားများစေသော လှပသောအပြုံးပန်းလေးများကို လူတိုင်းနှုတ်ဖျားတွင် ဆင်မြန်းစေချင်ပါသည်။ ရုပ်မလှသူပင်ဖြစ်လင့်ကစား နှစ်လိုဖွယ်ပြုံးပြသောအခါ ချစ်စရာအနေအထားသို့ ရောက်သွားသည်ဖြစ် ရာမျက်နှာလှလှရှိသူများအနေဖြင့် မျက်နှာမတည်ဘဲအပုပ်ဘဲ ပြုံးပြုံးလေးနေပါက မည်မျှလှသွားမည် ကို တွေးကြည့်စေချင်ပါသည်။
အပြုံးဟူသည် အမှန်စင်စစ် အိုစာနေသောမျက်နှာကိုပင် နုပျိုသွားစေသည်။
အပြုံးကြောင့်အိုခြင်းသည် မည်သည့်အခါမျှရှိလာမည်ဟုတ်ပေ။ အပြုံးဟူသည်လူအများမြင်သော မျက်နှာထက်တွင်သာ ထားရှိရခြင်းဖြစ်ရာ တင့်တယ်ရန်လိုသည်။ စစ်မှန်ရန်လိုသည်။ နှလုံးသားထက် မှလာရန်လိုသည်။
စစ်မှန်သော နှလုံးသားမှလာသော အပြုံးအတွက်အရှုံးဟူသည် မည်သည့်အခါမျှ ရှိလာမည်မဟုတ်ပေ။ ထို့ကြောင့် ပြုံးပါ။ နှစ်လိုစွာ ပြုံးပါ။ ဖော်ရွေစွာပြုံးပါ။ နှလုံးသားမှအလှကို အပြုံးနှင့်တန်ဆာဆင်ပါ။ မုဒိ တာမှရိုက်ခတ်ခြင်းဖြစ်သော အပြုံးများသာမျက်နှာထက်တွင် ဝေဆာစေပါ။ ကျက်သရေဝေဖြာမည်ကို အာမခံပါသည်။ လူတိုင်းပြုံးတတ်ကြပါစေ။    ။
ကြေးမုံသတင်းစာ
ဇူလိုင် (၁၃) ရက်၊ ၂၀၁၄ ခုနှစ် Share

No comments: