page

သင်နှစ်သက်ရာ အရောင် ဖြင့်ရွေးချယ်ကြည့်ရူနိုင်ပါသည်

Sunday, July 29, 2012

ထူးမြတ်တဲ့ လ၀ါဆို

ညချစ်သူ | 1:07 AM | |
ညချစ်သူ | 1:07 AM |


|




Best Blogger Tips
Share


မြန်မာလ ဆယ့်နှစ်လ ရှိသည့်အနက် ၀ါဆိုလသည် စတုတ္ထမြောက်လဖြစ်သည်။ ရက်ပေါင်း ၃၀ရှိသော ရက်စုံလဖြစ်သည်၊ ၀ါထပ်သောယ္ခုနှစ်တွင်ပထမ၀ါဆို၊ဒုတိယ၀ါဆိုဟုနှစ်မျိုးခေါ်ဆို၍ရသောလမျိုးဖြစ်သည်။ ၀ါဆိုလသည် မြန်မာနိုင်ငံ၏ နွေရာသီနှင့်မုတ်သုံရာသီ ကာလအပိုင်းအခြားတွင်ဖြစ်ပြီး၊ အင်္ဂလိပ်လ ဇွန်၊
ဇူလိုင်လအတွင်းတွင် ကျရောက်လျှက်ရှိသည်။ 


ဝါဆိုလ၏ဆိုလိုရင်းမှာ ၀ါ သည်နေထိုင်ခြင်း ၊ ဆိုသည် ရွတ်ဆိုခြင်းဟု အနက်ဖွင့်ဆိုကြသည်။ မိုးတွင်းသုံးလပတ်လုံး ရဟန်းတော်များသီတင်းသုံးရာကျောင်း၌ နေထိုင်ပါ မည်ဟုအဆိုပြုသောလကို ၀ါဆိုလဟုခေါ်ဆိုသည်။ တစ်နည်းအားဖြင့် ၀ါဆိုလကိုပုဂံခေတ်ဦးတွင် မယ်တာ ဟုရေးသားအသုံးပြု
ခဲ့ကြသည်။မယ်တာဟူသောစကားလုံး၏အဓိပ္ပါယ်မှာ မယ် သည်လယ်ယာ ၊ မိုး ၊ မြေ ကိုကိုယ်စားပြုပြီး ၊
တာ ဆိုသည်မှာတိုင်းတာခြင်းဟု အနက်ဖွင့်ဆိုသည်။ ထို့ကြောင့် လယ်ယာမိုးမြေကိုတိုင်းတာသောလ
ဟုလည်းဆိုနိုင်ပါသည်။မြန်မာစာပေ တို့တွင်ဝါဆိုလကို နွေတာလ ဟုလဲခေါ်ဆိုကြသည်။
ဝါဆိုလပြည့်နေ့သည် နွေကာလ၏ အဆုံးအဖျားကို ရောက်သောကာလဖြစ်၍ နွေတာလဟုခေါ်ဆိုသည်
ဟု မှတ်သားရဘူးပါသည်။ပုဂံခေတ်နှောင်းပိုင်းတွင် မယ်တာ မှ နွေတာလဟု ပြောင်းလဲခေါ်ဆိုခဲ့ကြသည်။


မင်းကြီး စွာဆော်ကဲလက်ထက် မိဖုရားဖွားစော၏အလှူတော်ကျောက်စာတွင်
 { ဘုရားမြတ်မွန်၊ နှိဗ္ဗာန်လွန်ပြီး၊ သာသနာနှစ်၁၉၄၂ ၊ သက္ကရာဇ်၇၆၀ ၊နွေတာလဆန်း } 
ဟူ၍ရေးသားထားသောကြောင့် နွေတာလဟူသောအသုံးအနှုံးသည် ။ ပုဂံခေတ်မှစတင်သုံးစွဲလာသော 
အသုံးဖြစ်ကြောင်း မှန်းဆနိုင်ပါသည် ။ဤ၀ါဆိုလသည်နွေတာလဟူသော အမည်အပြင် ၊ မလွယ်တာလ၊ မြွတ်တာလ ၊ နွယ်တာလ ၊ နတ်ရှောင်လဟူ၍ ခေါ်ဝေါ်တတ်ကြပါ သေးတယ် ။  
နတ်ရှောင်လဆိုတာကတော့ အသူရာနတ်မင်း  က သူ့သမီး သုဇာတာကို သိကြားမင်းခိုးသွားသဖြင့် သိကြားကို အငြိုးထားပြီး ပုန်းညက်ပန်းတွေပွင့် တိုင်း သိကြားမင်းနဲ့စစ်တိုက်ရာ ရှုံးသဖြင့်ထွက်ပြေးရသောလဖြစ်သောကြောင့် (ဒါမှမဟုတ်) သိကြားမင်းရဲ့ အန္တရာယ်ကို ရှောင်ရှားရာလ ဖြစ်သောကြောင့် နတ်ရှောင်လဟုလဲခေါ်ဆိုကြောင်း ပေါရာဏ ရှေးစကားတို့ကိုမှတ်သားဘူးပါသည် ။ 
{ဂျိုး ဂျိုမ့် ညံမာန်တင်းကာပ၊ အသူရာသိကြားမင်းက စစ်ခင်း ခါပြိုင်ကြသည်၊ ဒီလဒီရာသီ } 
  
ဟူသောသီချင်းစာသားလေးက ဒီနတ်ရှောင်လကို ရည်ရွယ်ရေးသား ထားတာဖြစ်ပါတယ် ။ 
ဝါဆို လ၏ ယေဘုယနေထွက် ချိန်မှာ နံနက် ၄ နာရီ ၄၈ မိနစ်ဖြစ်ပြီး၊ နေ၀င်ချိန်မှာ ညနေ ၇ နာရီ ၁၂ မိနစ်ဖြစ်သည်။၁၂လရာသီအနက်ဝါဆိုလသည် နေ့ တာအရှည်ဆုံးလဖြစ်သည်။ဝါဆိုလကိုကိုယ်စားပြုသော
ရာသီမှာ မြန်မာအခေါ် ကရကဋ် ၊ ပါဠိ အခေါ်အားဖြင့် ကက္ကဋ ဖြစ်သည်။ မြန်မာအခေါ်ဝါဆိုလကို ဥရောပတိုက်တွင်ရာသီအားဖြင့် ကင်ဆာ (Cancer) ဟုခေါ်သည်။ ကိုယ်စားပြုသောရုပ်ပုံမှာ ပုဇွန်လုံး သို့မဟုတ် ကဏာန်းကောင် ဖြစ်သည်။ ရုပ်ပုံအားဖြင့်ပုဇွန်လုံးနှင့် ရာသီအားဖြင့် Cancer ဟူသောအမည်သည် ဆက်စပ်နေသည်။ ပုဇွန်လုံးသည်ခြေထောက်များစွာဖြင့် နေရာမျိုးစုံသွားသကဲ့သို့ Cancerခေါ်သည့်ရောဂါသည်လည်းဖြစ်သည့်နေရာတွင်မကအခြားနေရာများသို့ကူးစက် စေသည့်အဓိပ္ပါယ်ကို
ဖေါ်ညွှန်းခြင်းဖြစ်ပါသည်။ 
ဝါဆိုလပြည့်နေ့ (ဓမ္မစကြာအခါတော်နေ့)
ဝါဆိုလပြည့်နေ့သည် ဗုဒ္ဓဘာသာဝင်အပေါင်းတို့၏ ထူးခြားမွန်မြတ်သည့် နေ့ထူးနေ့မြတ်တစ်ခု ဖြစ်ရခြင်းမှာ သုံးလောကထွဋ်ထား ဗုဒ္ဓမြတ်စွာဘုရား၏ ဘ၀ဖြစ်တော်စဉ်၌ ထူးခြားမွန်မြတ်ပြီး မင်္ဂလာအထပ်ထပ်နှင့် ပြည့်စုံသော နေ့တစ်နေ့ဖြစ်သောကြောင့် ဖြစ်ပါသည်။


မဟာသက္ကရာဇ် ၆၇ ခုနှစ် ၀ါဆိုလပြည့် ကြာသပတေးနေ့ မိုးသောက်ယံအချိန်တွင် သုဒ္ဓေါဒနမင်းကြီး၏ မိဖုရားခေါင် သီရိမဟာမာယာဒေ၀ီသည် ၎င်း၏ ၀မ်းကြာတိုက်အတွင်း ဆင်ဖြူတော်မြတ်သည် လက်ရာရစ်လှည့်ပြီး လက်ယာနံပါးမှ ၀င်ရောက်သည်ဟု အိပ်မက်မြင်မက်တော် မူပါသည်။ ဤသည်ကား အလောင်းတော် သိဒ္ဓတ္ထ ပဋိသန္ဓေ ယူတော်မူခြင်း ဖြစ်ပါသည်။


မဟာသက္ကရာဇ် ၉၆ ခုနှစ် ၀ါဆိုလပြည့်နေ့တွင် အလောင်းတော်သည် မြင်းလေးစီးကသော ရထားဖြင့် ဥယျာဉ်တော်သို့ ထွက်တော်မူခဲ့ရာ သူအိုတစ်ဦးကို မြင်တွေ့ခဲ့ရ၏။ တစ်နေ့တွင် မိမိလည်း ထိုသို့အိုရမည်ဟု ဆင်ခြင်တော်မူသည်။ နောက်အကြိမ်များ၌လည်း သူနာ၊ သူသေတို့ကို မြင်တွေ့မိပြန်သောအခါ မိမိလည်း ထိုသို့ နာရ၊ သေရဦးမည်ဟု စဉ်းစားဆင်ခြင်မိလေသည်။ နောက်ဆုံးတစ်ကြိမ်၌ကား ရဟန်းတစ်ပါးကို မြင်တွေ့တော်မူရာမှ ရဟန်း၏ အကျင့်သီလသည် သတ္တ၀ါတို့အကျိုးကို ဖြစ်ထွန်းစေပုံနှင့် ဘ၀မှ လွတ်မြောက်နိုင်ပုံတို့ကို ဆင်ခြင်မိသဖြင့် မိမိလည်း ရဟန်းပြုမည်ဟု ဓိဋ္ဌာန်တော်မူပါသည်။


မဟာသက္ကရာဇ် ၉၇ ခုနှစ်၊ ၀ါဆိုလပြည့် တနင်္လာနေ့ ညဥ့်သန်းခေါင်ယံအချိန်တွင် ဆန္ဒအမတ်ကိုခေါ်၍ ကဏ္ဍကမြင်းတော်ဖြင့် တောထွက်တော်မူခဲ့ပါသည်။ အနော်မာမြစ်ကမ်းသို့ ရောက်သောအခါ တစ်ကိုယ်တည်း ကျင့်ကြံအားထုတ်ရန် ရည်သန်၍ အ၀တ်တန်ဆာများနှင့် ကဏ္ဍကမြင်းကို ဆန္ဒအမတ်အား လွှဲအပ်ကာ နေပြည်တော်သို့ ပြန်လွှတ်တော်မူပါသည်။

မဟာသက္ကရာဇ် ၁၀၉ ခုနှစ် ၀ါဆိုလပြည့်နေ့ ညချမ်းအချိန်အခါတွင် သာဝတ္ထိပြည်၊ ကဏ္ဍမည်သော သရက်ဖြူပင်အနီး၌ ရတနာစင်္ကြံကို ဖန်ဆင်း၍ နှစ်ဆယ့်လေးယူဇနာရှိသော လူပရိသတ်နှင့်တကွ နတ်ဗြဟ္မာတို့အား ရေအစုံ မီးအစုံ တန်ခိုးပြာဋိဟာ ပြတော်မူခဲ့ပါသည်။


ဝါဆိုလတွင်ကျင်းပသောပွဲတော်မှာ ပဉ္စင်းတော်ခံပွဲဖြစ်သည်။ ပဉ္စင်းတော်ခံပွဲကျင်းပရခြင်းနှင့် ၀ါဆိုလဟုခေါ်ဆိုရခြင်းမှာစပ်ဆပ်နေပါသည်။ ၀ါဆိုလသည်မိုးရာသီဖြစ်၍ သစ်ပင်မြက်ခင်းတို့ စိမ်းလန်းစိုပြည်စွာပေါက်ရောက်သည်။ ဘုရားရှင်လက်ထက်ကရဟန်းသံဃာတော်များ ၀ါဆိုလတွင်ဒေသစာရီကြွချီကြရာ၌ လူတို့စိုက်ပျိုးထားသော သစ်ပင်ပန်းမန်တို့ပျက်စီးခြင်းသို့ရောက်ရ၏။ လူတို့ကလည်း မိုးတွင်း၌ရဟန်းသံဃာတို့ခရီးသွားကြရာတွင် စိမ်းဆိုသောမြက်ခင်းတို့ကိုနင်း၍ ပိုးမွှားသတ္တ၀ါတို့ကို သေကျေခြင်း သို့ရောက်ရှိစေသည်ဟု ပြစ်တင်ဝေဖန်ကြသည်။ ထိုကြောင့် မြတ်စွာဘုရား ကြားသိတော်မူသည်တွင် ရဟန်းတို့အား စည်းဝေးစေပြီး  "ရဟန်းတို့ ၀ါတွင်း
သုံးလပတ်လုံး ၀ါဆိုခြင်းကို ငါဘုရား ပညတ်တော်မူ၏" ဟု မိန့်တော်မူသည်။


ထိုမှစ၍ ၀ါဆိုလပြည့်ကျော် ၁ ရက်နေ့တွင် သံဃာတော်များသည် မိမိတို့သီတင်းသုံးမည့်ကျောင်း၌ မြတ်စွာဘုရား၏ ရှေ့တော်မှောက်ဝယ် "ဣမသ္မိံ ၀ိဟာရေ ဣမံတေမာသိဝဿံ ဥပေမိ" ဤကျောင်းတွင် မိုးသုံးလပတ်လုံး ဆည်းကပ်ပါမည်ဟု ရွတ်ဆိုဝါကပ်ကြရသည်။ ရဟန်းတော်တို့သည် မိမိတို့ သီတင်းသုံးနေထိုင်ရာ ကျောင်းတိုက်အတွင်းမှ အရပ်တစ်ပါးသို့ ညဥ့်အိပ်ညဥ့်နေ ခရီးထွက်ခွာခြင်း မပြုရဘဲ ၀ါဆိုလပြည့်ကျော် ၁ ရက်နေ့မှ သီတင်းကျွတ်လပြည့်နေ့အထိ ၀ါဆိုဝါကပ်တော် မူကြရလေသည်။


ထိုကဲ့သို့ သံဃာတော်အရှင်သူမြတ်များ ၀ါတွင်းသုံးလပတ်လုံး ၀ါဆိုဝါကပ် ကျင့်သုံးဆောက်တည်တော်မူကြသည့် အချိန်ကာလ၌ ဗုဒ္ဓဘာသာဝင် သူတော်စင်အပေါင်းတို့ကလည်း ဥပုသ်သီတင်းနေ့တိုင်း ဥပုသ်ဆောက်တည်ခြင်း၊ တရားနာခြင်း၊ တရားဆွေးနွေးခြင်းများ ပြုလုပ်ကြ၏။ ၀ါတွင်းကာလအတွင်း ထိမ်းမြားလက်ထပ်မင်္ဂလာ ပြုခြင်းများကိုလည်း ရှောင်ကြဉ်ကြရလေသည်။


မြန်မာနိုင်ငံသည် တောတောင်အင်းအိုင်ပေါများသည့်နိုင်ငံဖြစ်သည့်အလျောက် သစ် သီးပန်းမန်တို့သည်လည်း ၁၂ ရာသီမပြတ်ဖူးပွင့်ဝေဆာနေကြပေသည်။ ၀ါဆိုလတွင် ပွင့်သောပန်းမှာ ပုန်းညက်ပန်းဖြစ်သည်။ မြတ်လေးပန်းသည်လည်း ၀ါဆိုလတွင်ပွင့်သောပန်းဟု ရှေးစာဆိုများစပ်ဆိုခဲ့သည့် ကဗျာလင်္ကာများအရမှတ်သားနိုင်ပါသည်။ 
မဟာအတု လမင်းကြီးက သူ့ရဲ့၁၂လရာသီလွမ်းချင်းမှာ ဒီလိုလေးစပ်ဆိုပါတယ်

{ရေလျှံတဲ့လ၀ါဆိုမှာ ၊ပုန်းညက် ညို ၊သင်းလှတယ်လေး } တဲ့ ။။။။
လူဦးမင်းနဲ့ဖိုးသူတော်ဦးမင်းရဲ့၁၂လရာသီဖွဲ့မှာတော့
 {ပန်းများလှစ် ကြူ ၊မဉ္စူရွှေခတ် ၊ပုန်းညက်ကြိုင်သင်း } လို့ရေးဖွဲ့ခဲ့ပါတယ် ။။။။
ကင်းဝန်မင်းကြီးရဲ့၁၂ရာသီပန်းဘွဲ့မှာ တော့ 
{ပုန်းညက်အနန်း ၊နှင်းဆီးပန်းနှင့် ၊စခန်းကြိုင်သင်း ၊ရဂုံတွင်းမှာ} လို့စပ်ဆိုပြီး ။။။။
အမည်မသိ ရှေးပညာရှိတဦးကတော့
{နက္ခတ်မိုးယံ၊ဗြုဗ္ဗာသာဠ်တို့ ၊လတံနီလျှက် ၊ရောင်ခြည်ယှက်က ၊ပုန်း ညက်ထိန်ထိန် ၊ ပွင့်ချင်းလိမ်ခဲ့
လို့ရေးသားစပ်ဆိုပြီး ၀ါဆိုလမှာ ပုန်းညက်ပန်းပွင့်ကြောင်းရေးသား ထားခဲ့ကြပါတယ် ။ ပုန်းညက်ပင်သည် အမြင့်ပေ ၈၀ ကျော်၊ လုံးပတ် ၁၀ ပေကျော်သည်ထိကြီးထွားနိုင်သော အပင်ဖြောင့်သစ်ပင်မျိုးဖြစ်သည်။ ပုန်းညက်ပန်းမှာ အဖြူရောင်ဖြစ်ပြီးနူးညံ့ ညက်ညောသည်။ ၀တ်ဆံမှာအ၀ါရောင် ဖြစ်ပြီး အခိုင်လိုက်ပွင့်ကာမွှေးကြိုင်သောရနံ့ရှိသည်။
မိုးသားတိမ်ကညို  လွမ်းစိတ်တွေ ပိုသထက်ပို ချစ်သော လ၀ါဆို။

မှာမြန်မာလူမျိုး ဗုဒ္ဓဘာသာတို့ သည် ၀ါဆိုလပြည့်နေ့တွင် သံဃာတော်များအား ၀ါဆိုသင်္ကန်း၊ ဖယောင်းတိုင်၊ ပန်း စသည့်လှူဖွယ်ပစ္စည်းများကို ကပ်လှူပူဇော်ကြသည်။ မြန်မာတို့၏အယူအဆအရ ယခုဘ၀တွင် ၀ါဆိုသင်္ကန်း ကပ်လှူပူဇော်ခဲ့ပါက နောင်ဖြစ်လေရာဘ၀ဆက်တိုင်းတွင် အ၀တ်အစားနှင့်ပတ်သက်၍ ပူပင်စရာမရှိဟုယူဆကြသည်။

{၀ါဆိုမည်ဆန်း၊ မြတ်သင်္ကန်း၊ လှူဒါန်းကြလေလျှင် ၊သောတာပန်နှယ် 
                                                                        ၊ဂုဏ်ရည်ကြွယ် ၊   အပယ်လွတ်ကင်စင်}  
ဆို တဲ့ကဗျာလေးအတိုင်း ၀ါဆိုသင်္ကန်းကပ်လှူပူဇော်၍ အပယ်လေးပါး လွတ်ကင်းကြပါစေကြောင်း ဆုမွန်းကောင်းတောင်းအပ်ပါတယ်ခင်ဗျာ ။
                                                                                                      ညချစ်သူ
ကိုးကား

http://hninmoemoe.blogspot.com/
http://www.cherrymyay.com/

Share

No comments: